नुवाकोट, २६ फागुन ।
नेकपा (एमाले) नुवाकोटको अध्यक्षमा नारायणप्रसाद खतिवडा विजयी हुनुभएको छ ।
आज बिहान आएको मतदानको अन्तिम परिणाम अनुसार खतिवडाले ३४९ मत प्राप्त गरी विजयी हुनुभएको हो । उहाँका प्रतिद्वन्द्वी विन्दा ढुङ्गानाले २४१ मत प्राप्त गर्नुुभएको छ ।
सार्वजनिक भएको मत परिणामअनुसार अध्यक्षदेखि विभिन्न पदमा ७१ जनाका लागि भएको निर्वाचनमा नारायणप्रसाद खतिवडाको खेमाले बहुमत कायम गरेको छ ।
खतिवडाका ४४, ढुङ्गानाका २१ र दुबै खेमामा आफ्नो नाम राखेका छजना निर्वा्चित भएका छन् ।
सबैभन्दा बढी मत महिला सदस्यका उम्मेदवार शान्ता थापाले ३५७ र सबैभन्दा कम लेखा कमिटीका सचिवका उम्मेदवार आशीषकुमार मिजारले ३२ पाउनुभएको छ ।
उपाध्यक्षमा बद्री मैनाली, सचिवमा बुद्धि प्रधान र उपसचिवमा विष्णुप्रसाद लोहनी विजयी हुनुभएको छ । यसैगरी निर्वाचन कमिटीको अध्यक्षमा यमप्रसाद खतिवडा र लेखा कमिटीको अध्यक्षमा पद्म उप्रेती चुनिनुुभएको छ ।
