काठमाण्डौ,२५ फागुन ।
नेपाली कांग्रेसका महामन्त्री र कोषाध्यक्षको निर्वाचनको मतगणना जारी छ । ललितपुरको सानेपास्थित पार्टी केन्द्रिय कार्यालयमा जारी मतगणनामा संस्थापन पक्षका उमेद्वारले अग्रता लिएका छन् ।
पछिल्लो परिणाम अनुसार, महामन्त्रीमा शशांक कोईरालाले ४ सय ७४ , अर्जुननरसिंह केसीले ३ सय ५६ र गगन थापाले २ सय २९ मत प्राप्त गर्नुभएको निर्वाचन समितिले जनाएको छ ।
कोईराला पौडेल, गगन सिटौला र केसी देउवा पक्षबाट महामन्त्रीका उमेद्वार हुनुहुन्छ । यस्तै कोषाध्यक्षमा पौडेल प्यानलकी सीतादेवी यादवले १ सय २४ र देउवा प्यानलकी चित्रलेखा यादवले १ सय ७ मत प्राप्त गर्नुभएको छ ।
सिटौला प्यानलबाट कोषाध्यक्षका उमेद्वार उमाकान्त चौधरीले ४५ मत ल्याउनु भएको छ भने स्वतन्त्र उमेद्वार कृष्ण कार्कीले ५ मत प्राप्त गर्नुभएको निर्वाचन समितिले जनाएको छ ।
दुवै पदको नतिजा आज बेलुकासम्म टुंगो लाग्ने निर्वाचन समितिका सदस्य गोपालकृष्ण घिमिरेले जानकारी दिनुभयो । केन्द्रिय सदस्यको मतगणना भने भोलीबाट मात्र हुने घिमिरेले बताउनुभयो । आगामी तीन दिनभित्र सबै नतिजा प्रकाशित भइसक्ने निर्वाचन समितिले जनाएको छ ।
