काठमाडौ २३ फागुन ।
बर्दिया र डडेलधुरामा गएराति भएको सवारी दुर्घटनामा ७ जनाको मृत्यु भएको छ । बर्दियाको बबई नगरपालिमा जन्ती बोकेको बस दुर्घटना हुँदा चार जनाको घटनास्थमै मृत्यु भएको प्रहरीले जनाएको छ ।
जिल्लाको धधवार–७ बाट बेहुली लिएर बबई नगरपालिका–१० शाहीपुर फर्किदै गरेको भे १ ख ८५४ नम्बरको जन्ती बस बबई नगरपालिका–६ मैनवारमा दुर्घटना भएको इलाका प्रहरी कार्यालय भुरिगाउँले जनाएको छ ।
दुर्घटनामा परी मृत्यु हुनेहरुमा स्थानीय १९ वर्षीय सन्तोष थारु, १९ वर्षकै निरज थारु, १४ वर्षीय अरुण थारु र १७ वर्षीय बिष्णु थारु रहेको प्रहरी नायव निरिक्षक दुर्गा भट्टले जानकारी दिनुभयो ।
दुर्घटनामा अन्य २० जना घाइते भएका छन । घाइते मध्ये १० जनाको अवस्था गम्भिर रहेको बताइएको छ । घाइते हरुलाई उपचारका लागि बाँकेको कोहलपुर मेडिकल लगिएको प्रहरीले जनाएको छ ।
यस्तै डेलधुराको मणिलेकमा भएको जीप दुर्घटनामा तीन जनाको मृत्यु भएको छ । जिल्लाको मणिलेक बडममा गएराति से १ ज ७०६ नम्बरको जीप दुर्घटना हुँदा तीन जनाको घटनास्थलमै मृत्यु भएको प्रहरीले जनाएको छ ।
मृत्यु हुनेमा मणिलेक–२ का छबिलाल अवस्थी, मणिलेक–१ का खडक राज अवस्थी र गाडी चालक शेल भूल रहेको जिल्ला प्रहरी कार्यालय डडेलधुराले जनाएको छ ।
दुर्घटनामा परि गम्भीर घाइते भएका मणीलेक–१ का गणेश अवस्थीलाई उपचारका लागि नेपालगञ्ज लगिएको छ । साँघुरो सडकमा सन्तुलन नमिल्दा दुर्घटना भएको हुन सक्ने प्रहरीको अनुमान छ ।
