काठमाडौं , २२ फागुन।
नीति तथा कार्यक्रम पास गर्दै नेपाली कांग्रेसको १३औँ महाधिवेशनको बन्दसत्र सकिएको छ ।
भृकुटीमण्डपमा भएको बन्दसत्रले महामन्त्रीको प्रतिवेदनका साथै नीति तथा कार्यक्रम पारित गरेको छ । कार्यबाहक सभापति रामचन्द्र पौडेलले भन्नुभयो, ‘बन्द सत्र सकियो । नीति तथा कार्यक्रम पास भएको छ । भोलि मतदान हुनेछ ।’
उहाँका अनुसार पार्टी कार्यालयले आवश्यक तयारी गरेर नीति तथा कार्यक्रम सार्वजनिक गर्नेछ । कांग्रेसको नयाँ नेतृत्व चयनका लागि भोलि मतदान हुनेछ । विहान ८ बजेदेखि ४ बजेसम्म मतदानको समय तोकिएको छ । लगतै मतगणना सुरु हुनेछ ।
सुरुमा सभापतिको मतगणना हुनेछ । पहिला सभापतिको सभापतिको मतगणना गरिनेछ र दोस्रो चरणमा जानु पर्ने अवस्थामा आएमा अन्य पदको मतगणना स्थगित गरेर दोस्रो चरणको चुनाव गरिनेछ ।सभापतिका लागि ५१ प्रतिशत मत ल्याउनुपर्छ । सभापतिका लागि चुनावी मैदानमा शेरबहादुर देउवा, रामचन्द्र पौडेल र कृष्ण सिटौला हुनुहुन्छ ।
यसैविच छलफलमा भाग लिने अधिकांश सदस्यले बन्दसत्रमा नीति तथा कार्यक्रमबारे पर्याप्त छलफल हुन नसकेको बताएका छन् । सैदान्तिक र वैचारिक रुपमा नीति तथा कार्यक्रम ठिकै भएपनि व्यवहारिक हुन भने नसकेको उनीहरुको भनाईछ ।
