आज फागुन २१ गतेकै दिन झापा विद्रोहमा लागेर पञ्चायतविरुद्ध सङ्घर्षको नेतृत्व गरेको अभियोगमा तत्कालीन निरङ्कुश सरकारले ओलीकै सहयोद्धा झापाका रामनाथ दाहाल, नेत्र घिमिरे, वीरेन राजवंशी, कृष्ण कुइँकेल र नारायणप्रसाद श्रेष्ठलाई सुखानी जङ्गलमा गोली हानी हत्या गरेको थियो ।

सहादतको ४३ वर्षपछि मात्र सुखानीका सहिदले मान्यता पाउनुमा एमालेको नेतृत्वमा सरकार हुनु र त्यसमा पनि सहिदका सहयोद्धा नै प्रधानमन्त्री रहनु मुख्य कारण भएको झापा आन्दोलनका अग्रज नेता एवम् सांसद नरेश खरेल बताउनुहुन्छ ।

यसअघि एमालेकै मनमोहन अधिकारी, माधवकुमार नेपाल र झलनाथ खनाल प्रधानमन्त्री भइसकेका थिए भने एकीकृत नेकपा(माओवादी)बाट पुष्पकमल दाहाल र डा बाबुराम भट्टराई सोही पदमा पुगिसक्नुभएको थियो । तर उहाँहरूको कार्यकालमा समेत सुखानीका सहिदलाई राज्यले चिनेन ।

सुखानीका सहिद कम्युनिस्टका मात्र सम्झिन नहुने उल्लेख गर्दै एमाले झापाकी नेत्री मीना उप्रेतीले सरकारले सुखानी लगायतका सहिदलाई मान्यता दिएकामा खुसी व्यक्त गर्नुभयो ।

सहिद रामनाथ दाहालका छोरा नरेन्द्रले भन्नुभयो, “धेरै पहिलेदेखि हामीले पार्टीलाई घच्घच्याएका थियौँ, घोषणाले जनताका लागि बलिदान गरेका सच्चा सहिदको सम्मान भएको छ ।” आज सुखानीमा ँ विभिन्न राजनीतिक दलले कार्यक्रमको आयोजना गरेका छन् ।