काठमाण्डौ,१७ फागुन ।
अख्तियार दुरुपयोग अनुसन्धान आयोगले सशस्त्र प्रहरीका पूर्व महानिरीक्षक सनतकुमार बस्नेतसहित ७ जना प्रहरी अधिकारीविरुद्ध विशेष अदालतमा मुद्दा दायर गरेको हो ।
बस्नेतले ९ करोड १५ लाख ८१ हजार रुपैयाँ भ्रष्टाचार गरेको दाबी गर्दै अख्तियारले मुद्धा दाएर गरेको हो । २०६६ वैशाखदेखि ०६८ श्रावण महिनासम्म सशस्त्रमा महानिरीक्षक पदमा रहँदा मातहत युनिटमा सामान ढुवानीमा भ्रष्टाचार गरेको ठहर गर्दै अख्तियारले मुद्दा दायर गरेको हो ।
यस्तै यही प्रकरणमा सामेल भएको भन्दै सशस्त्र प्रहरी निरीक्षक विनबहादुर थापाविरुद्ध पनि त्यति नै रकमको माग दावी गर्दै विशेष अदालतमा मुद्दा दायर गरिएको छ । यस्तै सशस्त्र प्रहरी निरीक्षक मनुहिरा महतविरुद्ध ७३ लाख र शिबबहादुर कार्की्विरुद्ध २३ लाख रुपैयाँ माग दावी गर्दै मुद्दा दायर गरिएको छ ।
सशस्त्र प्रहरी नायब निरीक्षक निलबहादुर श्रेष्ठ र लेखबहादुर खत्रीले १ करोड ६ लाख रुपैयाँ भ्रष्टाचार गरेको अख्तियारको ठहर छ । अर्का सशस्त्र प्रहरी नायब निरीक्षक देबेन्द्रकुमार श्रेष्ठविरुद्ध ८३ लाख रुपैयाँ माग दावी गरीएको छ ।
उनीहरु सबैले नियमविपरीत विभिन्न कर्मचारीको नाममा ढुवानी प्रयोजनको लागि भन्दै पेश्की लिएको देखाएर भ्रष्टाचार गरेको अनुसन्धानबाट देखिएको अख्तियारको दाबी छ ।
सामान नै ढुवानी नगरी सञ्चालन मै नभएका ट्रान्सपोर्टहरुको झुठ्ठा बिलहरु पेश गर्न लगाएर बुद्ध तथा यति एयरलाइन्सबाट कार्गो गरी मातहत युनिटहरुमा जिन्सी सामानहरु ढुवानी गराएको भनेर भ्रष्टाचार भएको दावी अख्तियारको छ ।
