काठमाण्डौ ,१२ फागुन ।
नेपालको माग अनुसार अझै भारतीय आयल निगम (आइओसी)ले पेट्रोलियम पदार्थको ‘लोडिङ्’ नगरेपछि नेपाल आयल निगमका प्रबन्ध निर्देशक गोपालबहादुर खड्का भारत जानुभएको छ ।
बारम्बार ताकेता गर्दा पनि आइओसीले इन्धन दिन आनाकानी गरेकाले सो बिषयमा छलफल गर्न खड्का भारत जानुभएको हो । ईन्धन कम आएकाले उपभोत्ताको माग अनुसार पेट्रोलियम पदार्थ वितरण गर्न नसकिएको निगमले जनाएको छ ।
निगमका प्रवक्ता मुकुन्द घिमिरेका अनुसार देशभर एक हजार ५०० किलोलिटर पेट्रोल र तीन हजार किलोलिटर डिजेल आवश्यक पर्छ । तर, पाचँ महिनादेखिको अभावका कारण बढी माग हुने गरेको छ ।
त्यसैगरी आइओसीले दैनिक ६५ बुलेट ग्यास आउनुपर्नेमा ४० तथा ४२ बुलेटमात्र लोडिङ दिने गरेको छ । प्रवक्ता घिमिरेले मागको ७० प्रतिशतमात्र इन्धन लोडिङ् भएकाले समस्या भएको बताउनुभयो ।
भारतले ईन्धनमा भने अहिले पनि नाकाबन्दी कायम राखेको बिषयमा संसदले पनि कुरा उठाएको थियो ।
कुल खपतको ३० प्रतिशत इन्धन चीनबाट खरिद गर्ने सम्झौता भएसँगै भारतीय पक्षले ७० प्रतिशतमात्र लोडिङ् दिएको जनाईएकोे छ ।
