सोलुखुम्बु, २९ माघ ।
सोलुखुम्बुको इलाका नं ९ मा पर्ने गोली, चौलाखर्क र भकाञ्जेका बासिन्दा यस वर्षको हिउँद याममा झुसिल्किराको प्रकोपबाट पीडित भएका छन् ।
झुसिल्किराले विभिन्न बोटबिरुवा खानुको साथै भुवा जस्तो उड्ने यसको रौंले आँखामा सङ्क्रमण भए अन्धोपनसमेत हुनसक्ने भयले यस क्षेत्रका बासिन्दा त्रसित भएका छन् ।
चौलाखर्क–३ सोलुखुम्बुका जनकजङ्ग बस्नेतका अनुसार झुसिल्किराको कारण चौलाखर्कमा मात्र एक दर्जन भन्दा बढी खसीबाख्रा र छवटा भैँसी मरिसकेका छन् ।
“यसको रौंँ उडेको र बिजेको देखिन्न, तर जिउँमा पर्न गयो भने चिलाएर के गराँैं र कसो गराँैं जस्तो हुन्छ”, बस्नेतले भन्नुभयो ।
थोरै सङ्क्रमण भयो भने पनि आँखा चिलाउने, पाक्ने तथा रातो हुने र शरीरको छाला सुन्निनुको साथै अत्यधिक पीडा हुने चौलाखर्कका साजन बिकले बताउनुभयो ।
विशेष गरेर उत्तिस, कटुसका रुखमा साङ्लो बाँधे झँै गरी झुसिल्किरो बाँधिएर बस्ने र एकैसाथ आक्रमण गर्ने गरेको चौलाखर्ककै कैलास खत्रीले बताउनुभयो । उहाँका अनुसार यसबेला यस्ता किराले खाएर उत्तीस, कटुसका सबै पात सकिएका छन् । यसको असर अलैँंचीखेतीमा पनि परेको छ ।
सोलुखुम्बुको इलाका नं– ९ र रामेछापको गुम्देल, बाम्तीभण्डारमा पनि झुसिल्किराको प्रकोप रहेको छ ।
