काठमाडौं,२४ माघ ।
नेपाल आयल निगमले भोली ४६ देखि ६० लटसम्मका मोटरसाइकल तथा स्कुटरलाई पाँच लिटरका दरले पेट्रोल बिक्री गर्ने तयारी गरेको छ ।
काठमाडौं उपत्यका र काभ्रेका विभिन्न ४४ वटा पम्पबाट भोली बिहान ९ बजेदेखि पेट्रोल बिक्री वितरण गरिने निगमले जनाएको छ । नविकरण गरिएको ब्लु बुकसहित लट नम्बरका आधारमा तोकिएका मध्ये आफूलाई पायक पर्ने पम्पमा गएर तेल भर्न निगमले आग्रह समेत गरेको छ ।
तोकिएको लट नम्बर अनुसार लाइनमा बसे नबसेको र बिक्री वितरण सहज रुपमा भए नभएको बारे बाणिज्य विभाग, नेपाल आयल निगम तथा प्रहरीको संयुक्त टोलीले अनुगमन गर्ने जनाइएको छ ।
निगमले यसअघि दुई दिन गरेर ४५ लटसम्मका मोटरसाइकल तथा स्कुटरलाई पेट्रोल बिक्री गरेको थियो । बाँकी लटका लागि पछि सूचना निकालिने निगमले जनाएको छ । आयल निगमले मोटरसाइकल तथा स्कुटरलाई लट नम्बरका आधारमा पेट्रोल बिक्री गर्दै आएको छ ।
