काठमाडौँ, १६ माघ ।
उपप्रधानमन्त्री एवम् सहकारी तथा गरिबी निवारण मन्त्री चित्रबहादुर केसीले परनिर्भरतालाई कम गर्न कृषि उत्पादन बढाउनुपर्नेमा जोड दिनुभएको छ ।
अष्ट ज अभियानले आज यहाँ आयोजना गरेको उपत्यकाव्यापी कृषि भेलामा उपप्रधानमन्त्री केसीले कृषि उत्पादन बढाउन सरकारबाट बीउ र मलमा विशेष छुटको व्यवस्था गर्न लागिएको बताउनुभयो ।
उहाँले कृषिमा आत्मनिर्भर नभएसम्म मुलुकको अर्थतन्त्र बलियो हुन नसक्ने भएकाले निर्वाहमुखी कृषिलाई आधुनिकीकरण र व्यवसायीकरण गर्नुपर्ने खाँचो औँल्याउनुभयो ।
पूर्व मुख्यसचिव लीलामणि पौडेलले पछिल्लो समय उत्पादित कृषि सामग्रीले उचित मूल्य नपाएकाले धेरैले कृषि पेसा छोड्दा खेतीयोग्य जमिन बाँझो रही आर्थिक नोक्सानी भएको बताउनुभयो ।
अष्ट ज अभियानका अध्यक्ष लोककृष्ण भट्टराईले प्रकृतिको सुरक्षासँगै मानवको हित गर्नु अभियानको उद्देश्य रहेको बताउँदै देश विकासको मुख्य आधार कृषि पेसा रहेकाले यसमा राज्यले विशेष जोड दिनुपर्ने बताउनुुभयो ।
सोही अवसरमा पूर्व मुख्यसचिव पौडेलसहित विभिन्न जिल्लाका २५ जना व्यक्तिले अभियानको आजीवन सदस्य दिएका थिए ।
