म्याग्दी, १४ माघ ।
बेनी नगरपालिका–१२ डडुवाका क्यान्सरपीडित जगत खत्रीको उपचारको लागि कोरियामा रहेका नेपालीबाट सहयोग प्राप्त भएको छ ।
हड्डीको क्यान्सरबाट पीडित १३ वर्षीय जगतको उपचारका लागि कोरियामा रहेका नेपालीबाट रु एक लाख १७ हजार ७०० सहयोग प्राप्त भएको अभियानका प्रचारप्रसार संयोजक लालबहादुर कार्कीले जानकारी दिनुभयो ।
डडुवामा रहेको ज्योति युवाक्लबको संयोजनमा सञ्चालन भएको जगत उपचार अभियानलाई कोरियाबाट प्रेम भण्डारीको संयोजकत्वमा आर्थिक सङ्कलन गरी सहयोग गरिएको हो ।
हालसम्म खत्रीको उपचारका लागि विभिन्न सङ्घसंस्थाबाट रु दुई लाख सहयोग प्राप्त भएको ज्योति युवाक्लबका सचिव गोविन्द बानियाँले जानकारी दिनुभयो ।
तेह्र पटक केमो चढाउनुपर्ने भएकोले रु ६ लाख खर्च लाग्ने भएपछि घरपरिवारले उक्त खर्च जुटाउन नसकेपछि आर्थिक सङ्कलन सुरु गरिएको थियो । चार महिनादेखि खत्रीको भरतपुर क्यान्सर अस्पतालमा उपचार भइरहेको छ । रासस
