काठमाडौं, ८ माघ ।
काठमाडौं उपत्यका सहित देशका अधिकांश स्थानमा अहिले कुहिरो लागेको छ । उपत्यकामा अहिले लागेको कुहिरोका कारण त्रिभूवन अन्तर्राष्टिय विमानस्थलबाट हुने सबै उडान प्रभावित भएको छ ।
कुहिरोका कारण २ सय मिटर मात्र भिजिविलिटी भएपछि अन्तर्राष्ट्रिय विमानस्थलबाट हुने सबै उडान प्रभावित भएको विमानस्थल स्रोतले जनाएको छ ।
सामान्यतया अन्तर्राष्ट्रिय उडानका लागि ३ हजार मिटरसम्मको भिजिविलिटी आवश्यक पर्दछ । यस्तै आन्तरिक उडानका लागि १५ सय मिटर भिजिविलिटी आवश्यक भएकाले दुवै उडान प्रभावित भएको हो ।
उपत्यका लगायत आसपासका क्षेत्रमा बिहान १० बजेपछि विस्तारै कुहिरो हट्दै जाने भएपनि तराईका जिल्लामा भने आज दिनभरी नै लाग्ने सम्भावना रहेको मौसमविद् समिर श्रेष्ठले जानकारी दिनुभयो ।
यसैबीच आज पहाडी क्षेत्रमा आंशिक बदली भएपनि अन्य स्थानको मौसम सामान्यतया सफा रहने जल तथा मौसम पूर्वानुमान महाशाखाले जनाएको छ ।
महाशाखाका अनुसार पश्चिमी वायुको प्रभाव हट्दै गएकाले पूर्व र पूर्वसँगै जोडिएको मध्य पहाडी क्षेत्रको एक दुई ठाउँमा हल्का वर्षाको संभावना रहेपनि बाँकी स्थानको मौसम भने सफा रहनेछ ।
तीन दिन पछि भने पुनः अर्को पश्चिमी वायु सक्रिय हुने भएकाले बदली हुने अनुमान गरिएको मौसमविद् श्रेष्ठले बताउनुभयो ।
