बेलायतको ट्राभल गाइड बुक “रफ गाइड” ले विश्वका १० उत्कृष्ट सूची सार्वजनिक गर्दै नेपाललाई पहिलो स्थानमा राखेपछि भूकम्प र तराई आन्दोलनका कारण थला परेको जिल्लाको पर्यटन व्यवसायलाई अन्तर्राष्ट्रियस्तरमा प्रचारप्रसार गरी बाह्य पर्यटक भित्र्याउन मद्दत पुग्ने व्यवसायीको विश्वास छ । सन् २०१५ मा पर्यटकीय जिल्ला मुस्ताङ भ्रमणमा आउने पर्यटकको सङ्ख्यामा करिब ४५ प्रतिशतले कमी आएको छ ।

पर्यटक नहुँदा मुस्ताङमा सञ्चालित १५० वटा साना तथा ठूला होटल बन्द हुने अवस्थामा पुगेका छन् । राउण्ड अन्नपूर्ण पदमार्गअन्तर्गत पर्ने जिल्लामा पदयात्राका साथै कला, संस्कृति र भू–बनोट अध्ययन तथा प्राकृतिक सुन्दरतामा रमाउन पर्यटक आउने गरेका छन् । पदयात्रामा रमाउने विश्वभरका पर्यटकलाई प्रकाशित गाइड बुकले सहयोग गर्ने मुस्ताङ उद्योग वाणिज्य सङ्घका अध्यक्ष खगेन्द्र तुलाचनले जानकारी दिनुभयो ।

“हामीले गर्ने प्रचारभन्दा अन्तर्राष्ट्रियस्तरमा हुने यस्तो प्रचारले ठूलो महत्व राख्छ,” उहाँले भन्नुभयो, “यो हाम्रा लागि सुखद् खबर हो ।” भूकम्पपछि अन्तर्राष्ट्रियस्तरमा नकरात्मक सन्देश गए पनि यहाँका पर्यटकीय गन्तव्य सुरक्षित रहेका छन् । देशको अस्थिरताले थुप्रै विदेशी पर्यटकले भ्रमण रद्द गरेको सन्र्दभमा प्रकाशित गाइड बुकले धेरै सहयोग पुग्ने पर्यटन व्यवसायी मीनराज गुरुङको भनाइ छ ।