काठमाडौं,२१ पौष ।
संयुक्त लोकतान्त्रिक मधेसी मोर्चाले तीन दलिय कार्यदलसँगको वार्ताका लागि तीन सदस्यीय कार्यदल गठन गरेको छ ।
बिजुली बजारस्थित तराई मधेस लोकतान्त्रिक पार्टीको कार्यालय आज बसेको बैठकले सरकारको तर्फबाट गठित तीन दलिय कार्यदलसँगको वार्ताका लागि तीन सदस्यीय कार्यदल बनाएको हो ।
गठित कार्यदलमा तमलोपाका हृदयश त्रिपाठी, संघीय समाजवादी फोरम नेपालका राजेन्द्र श्रेष्ठ तथा तराई मधेस सद्भावना पाटीका राम नरेश राय सदस्य रहनु भएको छ ।
बैठकपछि आयोजीत पत्रकार तमलोपाका हृदयश त्रिपाठीले मोर्चाले अघि सोरेको ११ बुँदे माग बारे तीन दलका तर्फबाट गठित कार्यदलसँग छलफल गर्ने जिम्मा कार्यदललाई दिइएको बताउनु भयो ।
मोर्चाद्धारा गठित कार्यदलले सरकारसँगको वार्ताका लागि खाका तयार गर्ने छ । यसैबिच मोर्चाको हिजोको बैठकमा सहभागी नभएको सद्भावना पाटीले भने कार्यदलमा आफ्नो दलका प्रतिनिधि नभएपनि आफूहरुको समर्थन रहेको बताएको छ ।
