पोखरा, १३ पुस ।
गण्डकी ट्रक यातायात व्यवसायी सङ्घले यस वर्ष सरकारबाट निर्धारित मापदण्ड नपुगेका २८ वटा ट्रकलाई विस्थापित गरेको छ ।
सरकारको नीतिबमोजिम वातावरणीय प्रदूषण बढाउने २० वर्ष नाघेका ट्रकका साथै अन्य विभिन्न कारणबाट सञ्चालनमा ल्याउन नसकिने २८ वटा ट्रकलाई विस्थापित गरिएको सङ्घका अध्यक्ष लीलाधर बरालले जानकारी गराउनुभयो ।
उहाँका अनुसार सङ्घमा आबद्ध लामो तथा छोटो दूरीका गरी हाल ९५७ वटा ट्रक सञ्चालन हुँदै आएका छन् । जसमध्ये ३३३ मिनी ट्रक, १७५ स्थानीय र लामो दूरीका ४४२ रहेका छन् ।
विस्थापित ट्रकका लागि प्रतिट्रक रु दुई लाखका दरले व्यवसायीलाई राहत सहयोग प्रदान गरिने बरालले बताउनुभयो । सङ्घले विस्थापन राहत कोषका लागि सङ्घमा आबद्ध व्यवसायीबाट प्रतिट्रक रु ३०० प्रतिमहिना सङ्कलन गर्दै आएको छ ।
हाल सङ्घमा आबद्ध ट्रकमा प्रत्यक्ष रुपमा एक हजार ९१४ जनाले प्रत्यक्ष रोजगार पाएको र ढुङ्गा बालुवा खानीमा काम गर्ने धेरै मजदुर अप्रत्यक्ष रुपमा लाभान्वित भएको सङ्घका निवर्तमान अध्यक्ष कृष्णहरि जिसीले जानकारी दिनुभयो । रासस
