काठमाडौ ९ पौष ।
काठमाडौं उपत्यकासहित देशभर हिजोको तुलनामा आज झन चिसो बढेको जल तथा मौसम पुर्वानुमान महाशाखाले जनाएको छ ।
आज बिहान काठमाडौं उपत्यकाको न्यूनतम तापक्रम दुई वर्ष यता कै कम मापन गरिएको छ । बुधबार शून्य दशमलव ९ डिग्री रहेकोमा आज शून्य दशमलव ८ डिग्रीमा झरेको महाशाखाले जनाएको छ ।
सन् १९७७ डिसेम्बरमा काठमाडौंको तापक्रम माइनस २ डिग्रीमा झरेको थियो । महाशाखाका अनुसार देशका अन्य स्थानको तापक्रम पनि घट्दै गएको छ । जुम्लाको तापक्रम माइनस ८ दशमलव ४ डिग्री र जीरीको माइनस ३ दशमलव ७ डिग्री मापन गरिएको छ ।
अहिलेको अवस्था हेर्दा अझै केहीदिन तापक्रम घट्दै जाने सम्भावना रहेको मौसमविद बरुण पौडेलले बताउनुभयो । चिसो बढेसँगै विभिन्न रोगको जोखिम बढ्ने भएकाले पूर्व सावधानी अपनाउन चिकित्सकको सुझाव छ ।
चिसो मौसममा रुघाखोकी, निमोनिया, दम, हृदयाघात, उच्च रक्तचाप लगायत समस्या आउने भएकाले बिहानीपख र बेलुका विशेष ध्यान दिन चिकित्सकले सुझाव दिएका छन् ।
