काठमाडौं, मंसिर २७ । मधेस आन्दोलनको समर्थन गर्दै नयाँ शक्ति निर्माण अभियानसहित मधेसी मोर्चासहितको संघीय गठबन्धन र आदिवासी जनजाति राष्ट्रिय आन्दोलनले आज राजधानीको शान्तिबाटिका र भद्रकालीबाट जुलुस निकालेका छन् ।
जुलुस नयाँ सडकमा पुगेर संयुक्त विरोधसभामा परिणत भएको थियो । विरोधसभामा सहभागी वक्ताहरुले मधेस आन्दोलनको तत्काल सम्बोधन गर्न सरकारसँग माग गरेका छन् । उनीहरुले मधेसको समस्याको समाधान भारतबाट नभई नेपालभित्रै खोजिनुपर्नेमा जोड दिए ।
बहुसंख्यक नेपालीको राय सुझावलाई बेवास्ता गरी केही दलका केही नेताहरुको मात्र तजबीजमा संविधान जारी भएको भन्दै उनीहरुले त्यो आफूहरुलाई स्वीकार्य नहुने बताए ।
उनीहरुले नयाँ संविधानले सबैलाई समेट्न नसकेकै कारण मुलुक चरम संकटमा फसेको भन्दै तत्काल संविधानमा संशोधन गरी मधेसी, थारु, जनजातिलगायत सबैको मागलाई सम्बोधन गर्नुपर्ने बताए ।
