काठमाण्डौ, २४ मंसिर ।
सरकार र आन्दोलनरत संयुक्त लोकतान्त्रिक मधेसी मोर्चाबीच आज वार्ताको तयारी भएको छ ।
मधेश आन्दोलनका बारेमा छलफल गर्न भारत सरकारको निमन्त्रणमा दिल्ली गएका मोर्चाका नेताहरु स्वदेश फर्किएपछि वार्ताको तयारी भएको हो । आज साँझसम्ममा प्रमुख तीन दल र मोर्चाका नेताबीच वार्ता हुने बालुवाटार स्रोतले जनाएको छ ।
सरकारसँग वार्ताअघि मोर्चाले आन्तरिक छलफल गर्ने बताएको छ । औपचारिक छलफल कार्यक्रम नभएपनि दिल्लीबाट फर्केका नेताहरुसँग अनौपचारिक कुरा हुने संघीय समाजवादी फोरम नेपालका नेता लालबाबु राउतले जानकारी दिनुभयो ।
आन्दोलनका विषयमा परामर्श गर्न दिल्ली पुगेका मोर्चाका नेतालाई भारतले वार्ताबाटै समाधान खोज्न सुझाव दिएको थियो । भारतीय विदेशमन्त्री सुष्मा स्वराजसहित अरु नेताले समेत सरकारले प्रस्तुत गरेको तीन बुँदे प्रस्तावमा छलफल गरेर निकास निकाल्न सुझाव दिएपछि मोर्चाले आन्तरिक छलफल गरेर सरकारसँग वार्तामा बस्ने तयारी गरेको हो ।
संविधान संशोधन प्रक्रिया अघि बढाउने, राजनीतिक समितिमार्फत तीन महिनाभित्र सीमांकन विवाद टुंगो लगाउने तीन दलको साझा धारणा मोर्चाले अस्वीकार गर्दै आएको छ ।
