काठमाडौँ, २० मङ्सिर ।
महानगरीय ट्राफिक प्रहरी महाशाखाले मादक पदार्थ सेवन गरी सवारी चलाउने कार्यलाई निरुत्साहन गर्न छड्के जाँचलाई कडाइ गरेको छ । इन्धन अभावका कारण हरेक छ घन्टा मात्र मापसेमा कडाइ गर्दै आएको महाशाखाले १२ घन्टा कडाइ गर्न थालेको छ ।
महाशाखाका प्रहरी उपरीक्षक एवम् प्रवक्ता पोषराज पोखरेलले जाँच नहुँदा धेरै दुर्घटना हुने भएकाले जाँचमा कडाइ गरिएको जानकारी दिनुभयो । उहाँले इन्धन अभाव र मापसे कडाइले पछिल्लो समयमा काठमाडौँ उपत्यकामा दुर्घटनाको संख्यामा कमी आएको बताउनुभयो ।
इन्धन अभावपछि उपत्यकामा बढी भाडा लिने ७९२ सवारी साधनलाई नियन्त्रणमा लिइएको महाशाखाले जनाएको छ । त्यसमध्ये साउनमा २२५, भदौमा २४४, असोजमा १८४, कात्तिकमा ५९ र मङ्सिरमा ८० सवारी साधन छन ।
काठमाडौँ उपत्यकामा गत महिनाको तुलनामा सवारी साधन आवतजावत संख्या बढेको छ । सार्वजनिक सवारी साधन ४० प्रतिशत र निजी सवारी साधन ५० प्रतिशत गुडेको महाशाखालले जनाएको छ ।
