काठमाडौ २० मंसिर ।
आन्दोलनरत मधेशी मोर्चा आवद्ध दलका थप दुई नेता आज दिल्ली जाँदैछन् । संघिय समाजवादी फोरम नेपालका अध्यक्ष उपेन्द्र यादव र तमलोपा अध्यक्ष महन्थ ठाकुर आज बिहान इन्डियन एयरलाइन्स्को उडानबाट दिल्ली जाने कार्यक्रम छ ।
मोर्चा आवद्ध दलका दुई नेता भने यसअघि हिजो नै दिल्ली गइसकेका छन् । सद्भावना पार्टीका अध्यक्ष राजेन्द्र महतो र तराई मधेश सद्भावना पार्टीका अध्यक्ष महेन्द्र राय यादव गएराति ८ ः ५० बजे इन्डियन एयरलाइन्सको उडानबाट दिल्ली पुगेका हुन् ।
लामो समयदेखि तराई मधेशमा आन्दोलनरत मोर्चाको माग सम्बोधनका सम्बन्धमा सरकारी तथा दलीय तर्फबाट प्रयास भइरहेका बेला मोर्चाका शिर्ष नेताहरु दिल्ली जानुलाई चासोका रुपमा हेरिएको छ ।
भारत बसाईका क्रममा मोर्चाका नेताहरु भारतीय विदेशमन्त्री सुष्मा स्वराजसँग, भारतीय प्रधानमन्त्री नरेन्द्र मोदीका राष्ट्रिय सुरक्षा सल्लाहकार अजित डोबल तथा विभिन्न राजनीतिक दलका नेताहरूसँग भेट गर्ने बताइएको छ ।
भारत सरकारको आमन्त्रणमा दिल्ली गएका नेताहरुले प्रधानमन्त्री मोदीसँग पनि भेट गर्ने बताइएपनि त्यस विषयमा तय भइसकेको छैन ।
