काठमाडौ १९ मंसिर । मुख्य तीन दल र आन्दोलनरत संयुक्त लोकतान्त्रिक मधेशी मोर्चाबीच आज वार्ता हुदैछ ।
मधेश समस्या समाधानका लागि प्रमुख तीन दलले तयार पारेको तीन बुँदे साझा धारणाका विषयमा मोर्चासँग छलफल हुन लागेको हो ।
वार्ताका लागि समय र स्थान भने तय भइसकेको छैन । प्रधानमन्त्री केपी शर्मा ओलीले आज अपरान्नसम्म मोर्चासँग वार्ता गर्ने तयारी गर्नुभएको बालुवाटार स्रोतले जनाएको छ ।
छलफलका लागि हिजो बोलाइए पनि मोर्चाका नेताहरु बालुवाटार नगएर भारतीय दुतावासमा राजदुतसागको छलफलमा व्यस्त भएपछि तीन दलसँग हुने भनिएको वार्ता स्थगित गरिएको थियो ।
तीन दलका तर्फबाट वार्ताको समय र स्थानबारे जानकारी नआएपनि दिउँसोसम्ममा वार्ता हुने मोर्चा आवद्ध दल सद्भावना पार्टीका सहअध्यक्ष लक्ष्मणलाल कर्णले जानकारी दिनुभयो ।
आजको वार्तामा मोर्चाका शिर्ष नेताहरु सहभागी हुने कर्णको भनाई छ । मोर्चाका नेताहरु भोली दिल्ली जाने तयारीमा रहेकाले आज तीन दलसँग वार्ताको तयारी भएको बताइएको छ ।
