काठमाडौं, १८ मंसिर ।
प्रमुख तीन दलले आन्दोलनरत मधेस केन्द्रित दलहरुसँग सहमतिका लागि तीन बुँदे साझा प्रस्ताव तयार गरेका छन् । प्रधानमन्त्री निवास बालुवाटारमा आज साँझ बसेको बैठकले मधेसी मोर्चाका मागबारे साझा प्रस्ताव तयार पारेको हो ।
बैठकले प्रदेशको सिमांकन राजनीतिक समिति गठन गरि तीन महिनामा टुंगो लगाउने र संविधानमा व्यवस्था गर्ने प्रतिबद्धता जनाएको छ । तीन दलले समावेशी सहभागिता तथा निर्वाचन क्षेत्र निर्धारणबारे अघिल्लो सरकारले संसदमा दर्ता गरेको संशोधन विधेयकलाई अगाडि बढाउने निर्णय गरेको छ ।
यस्तै उनीहरुले आन्दोलनका कार्यक्रम फिर्ता लिन मधेशी मोर्चालाई आग्रह समेत गरेका छन् ।
यसैबीच, बालुवाटारको बैठक छाडेर मोर्चाका नेताहरु महन्थ ठाकुर र उपेन्द्र यादव भारतीय दूतावास लैनचौर पुगपछि आज हुने भनिएको निर्णायक वार्ता पनि स्थगित भएको छ । सत्तारुढ एमाले, एमाओवादी र राप्रपा नेपाल तथा प्रमुख विपक्षी कांग्रेसका शीर्ष नेताहरुले बालुवाटारमा साँझ अबेरसम्म पर्खेपनि मोर्चाका नेताहरु उपस्थित भएनन् ।
