सर्लाही, १८ मंसिर ।
सर्लाहीको सदरमुकाम मलंगवास्थित जिल्ला प्रशासन कार्यालय र सशस्त्र प्रहरीको भन्सार सुरक्षा पोष्टमा गयराती अज्ञात समूहले पेट्रोल बम प्रहार गरेको छ ।
बजार क्षेत्र भित्र ठाउँठाउँमा गोली चलेको र बम पड्केको आवाज सुनिएको तर कुनै क्षति नभएको प्रहरीले जनाएको छ ।
सर्लाहीका प्रहरी प्रवक्ता प्रहरी नायव उपरीक्षक रमेश खड्काले दिएको जानकारी अनुसार दिउसो सर्लाहीको नवलपुरमा भएको प्रदर्शनकारीबीचको झडपमा ६ जना प्रहरी, ११ जना चुरे भावरका कार्यकर्ता र ८ जना मोर्चाका कार्यकर्ता घाइते भएका थिए ।
घाइते भएका आन्दोलनकारीहरुलाई उपचारका लागि सर्लाही जिल्ला अस्पताल मलंगवा पुर्याइएको थियो ।
यसैैविच मधेसी मोर्चाका नेता राजेन्द्र महतोले शान्तिपूर्ण आन्दोलन गरेका मोर्चा कार्यकर्तामाथि राज्यले दमन गरेको बताउनुभयो । उहाँले मोर्चाका कार्यक्रम विथोल्न सरकार नै लागेको आरोप लगाउनुभयो ।
