काठमाडौ १८ मंसिर ।
नेपाल विद्युत प्राधिकरणले आजदेखि लागु हुने गरी लोडसेडिङको समय थप गरेको छ । नयाँ तालिका अनुसार अब दैनिक ९ घण्टासम्म बिजुली कटौती हुने प्राधिकरणले जनाएको छ ।
प्राधिकरणको तालिका अनुसार बिहान र बेलुका खाना पकाउने समयमा बढी लोडसेडिङ हुने भएपछि विद्युत्तीय उपकरणमा खाना पकाउने उपभोक्तालाई समस्या हुने भएको छ ।
ग्यास नपाएपछि विद्युत्तीय चुल्हो र उपकरण प्रयोग गर्ने उपभोक्ताले बिद्युत अनियमित हुँदा यसअघि पनि समस्या झेल्दै आएका थिए ।
भूकम्पका कारण क्षति भएका विद्युत गृह सञ्चालन हुन नसकेको, विद्युत प्रणालीमा भार बढेको तथा नदीमा पानीको सतह घटेकाले लोडसेडिङको समय बढाइएको प्राधिकरणले जनाएको छ ।
प्राधिकरणले सार्वजनिक गरेको नयाँ तालिका अनुसार अब हप्तामा दुई दिन सात घण्टा, तीन दिन आठ घण्टा र दुई दिन नौ घण्टा बिजुली कटौती हुनेछ । यस्तै साताको पाँच दिन दुई पटक तथा दुई दिन तीन पटक लोडसेडिङ हुने प्राधिकरणले जनाएको छ ।
