काठमाण्डौ,१४ मंसिर ।
प्युठान जिल्लाको दक्षिणी क्षेत्रमा उत्पादन भएको आर्गानिक अदुवा यसवर्ष भारत निर्यात गर्न नपाउँदा किसानहरु मर्कामा परेका छन् ।
अन्य व्यवसाय छोडी व्यावसायिक अदुवा खेतीमा लागेका ढुङ्गेगढी, हङ्सपुर, बाङगेसाल, मर्काबाङ र तिराम गाविसका कृषकले उत्पादन गरेको अदुवाले बजार नपाउँदा बारिमै कुहिने अवस्था आएको छ ।
आर्गानिक रुपमा अदुवा उत्पादन गर्दैआएका २२० जना र रासायनिक मलको प्रयोग गरेर अदुवा उत्पादन गर्दै आएका यस क्षेत्रका ५०० कृषकले उत्पादन गरेको अदुवा भारत निकासी नहँुदा समस्यामा परेको ऐरावती बहुउद्देश्य साना किसान सहकारी संस्थाका अध्यक्ष चिन्तबहादुर शोमैले बताउनुुभयो ।
गतवर्ष मात्रै ८० टन अदुवा निर्यात गरेको ऐरावती बहुउद्देश्य साना किसान सहकारी संस्थाले यस पटक १०० टनसम्मको अदुवा भारतीय बजारसँगै कृष्णनगर, रुपेडियासँगै नवलपरासीलगायतका क्षेत्रमा निर्यात गर्ने लक्ष्य राखेको थियो ।
जिल्लामा वार्षिक दुईसय २० हेक्टर क्षेत्रफलमा अदुवा उत्पादन हुदैँ आएको छ । वार्षिक उत्पादनको दुई हजार ६५५ मेट्रिक टन अदुवा जिल्लामै खपत हँुदै आएको कृषि कार्यालयले जनाएको छ । जिल्लामा खपत भएको अदुवाबाट रु १५ करोड ९३ लाख कृषकले आम्दानी गरेका छन ।
