काठमाण्डौ,१३ मंसिर ।
झापामा शशस्त्र प्रहरी बल केचनाको नियन्त्रणमा रहेका भारतीय सीमा सुरक्षा बल एसएसबीका १३ जनालाई ७ घण्टापछि भारतीय प्रहरीको जिम्मा लगाइएको छ ।
भारतीय काउन्टर पार्टसँगको लामो छलफलपछि उनीहरुलाई एसएसबीका कमान्डर डिबी नागीको जिम्मा लगाएर पठाएको झापाका सहायक प्रमुख जिल्ला अधिकारी डम्मरु निरौलाले जनाकारी दिनुभयो ।
नेपालको सीमामा तेल तस्करलाई लखेट्दै आएका उनीहरुलाई स्थानीय बासिन्दाले नियन्त्रणमा लिएपछि सशस्त्र प्रहरीको टोलीले उद्धार गरी बेसक्याम्पमा राखेको थियो । तस्कर लखेटदै आएका एसएसवीले केचना–४ का मोहम्मद आलममाथि कुटपिट गरेका थिए ।
तेल तस्कर भागेर आलमका घरमा लुकेपछि एसएसवीले आलमको घर समेत तलासी लिएको स्थानीय लाल मियाँले जनाएका छन् । घटनालगत्तै पुगेको सशस्त्र फोर्सले १३ जनालाई नियन्त्रणमा लिएको थियो ।
जसमा चार जना हतियार सहित थिए । छलफलस्थल बाहिर स्थानीयबासीले भारतीय ज्यादती वढेको भन्दै नारावाजी समेत गरेका थिए ।
