काठमाण्डौ, १० मंसिर ।
मोरङको भातिगछमा आन्दोलनरत मधेसी मोर्चाका कार्यकर्ताले एकजनालाई पेट्रोल खनाएर जिउदै जलाउने प्रयास गरेका छन । सीमावर्ती भारतीय बजारबाट पेट्रोल लिएर आउँदै गरेका भाथिगछ २ का बब्लु राजवंशीलाई मोर्चाका कार्यकर्ताले पेट्रोल खन्याएर आगो लगाएका छन ।
राजवंशीले ल्याएको १५ लिटर पेट्रोल आधी भुईंमा र आधी उनकै शरीरमा खन्याएर आगो लगाएको जिल्ला प्रहरी कार्यालय मोरङका प्रहरी नायव उपरिक्षक प्रमोद खरेलले जानकारी दिनुभयो ।
भारतीय बजारबाट पेट्रोल ल्याउँदै गर्दा भारथिगछ ७ मा को १ प २६ ५० नम्बरको मोटरसाइकल रोकेर आगो लगाइएको थियो । प्रहरीका अनुसार आगो लगाउने भाथिगछ २ का जुगेश्वर मुखिया, जितेन्द्र मुखिया र अजय साह रहेका छन् ।
पेट्रोल खन्याएर आगो लगाएर फरार भएका उनीहरुको खोजी भइरहेको जिल्ला प्रहरी कार्यालयले जनाएको छ । भारतबाट ग्यारेजको प्रयोजनका लागि ल्याइएको पेट्रोल स्थानीय बन्दकर्ताले बन्दमा किन ल्याएको भन्दै खोस्ने प्रयास गरेपछी पीडितले प्रतिकार गर्दा त्यही पेट्रोल पोखेर शरीरमा आगो लगाइ दिएका थिए ।
आगो लागेपछि राजवंशीको ५० प्रतिशत भन्दा बढी शरीरका भागहरु जलेका छन् । पीडित राजवंशिको कोशी अञ्चल अस्पताल विराटनगरमा उपचार हुन नसकेपछि थप उपचारका लागि धरान स्थित विपि कोइराला स्वास्थ्य विज्ञान प्रतिष्ठानमा पठाइएको छ ।
