काठमाडौँ, १० मङ्सिर ।
व्यवस्थापिका–संसद्को आजको बैठक पनि प्रतिपक्षी र मधेसी दलको अवरोधका कारण अवरुद्ध भएको छ ।
बैठक प्रारम्भ हुनासाथ प्रमुख प्रतिपक्षी नेपाली काँग्रेस र संयुक्त लोकतान्त्रिक मधेसी मोर्चाका सांसद्ले आ–आफ्नो स्थानबाट उठेर बोल्न पाऊँ भन्दै संसदीय प्रक्रियामा अवरोध पु¥याउनुभएको थियो ।
सभामुख ओनसरी घर्तीले सङ्घीय समाजवादी फोरमका अध्यक्ष उपेन्द्र यादवलाई बोल्न दिएपछि काँग्रेसका सांसद्ले पहिला आफूहरुले बोल्न पाउनुपर्ने भन्दै उठेर होहल्ला गरेका थिए ।
यादवले भनाइ राखेसँगै मधेसी दलबाट बैठकमा नाराबाजी हुने स्थिति भएकाले काँग्रेस सांसदहरुले आफूहरुले पहिला बोल्न पाउनुपर्ने जिकिर गरेका थिए । हात उठाएपछि दलीय आधारमा पालैपालो सबै सांसदलाई बोल्न दिइने भएकाले त्यतातर्फ टिप्पणी नगरी आफ्नो स्थान ग्रहण गरेर सहयोग गर्न सभामुख घर्तीले आग्रह गर्नुभयो ।
सभामुख घर्तीले बोल्न समय दिने आफ्नो अधिकार भएको र विधिअनुसार समय दिइएकाले अवरोध नगर्न आग्रह गर्दागर्दै पनि सांसद्ले नमानेपछि बैठक स्थगन हुन पुगेको हो ।
काँग्रेसका सांसद्हरुले दलीय आधारको औचित्य सिद्ध गर्न र कसलाई पहिला बोल्न दिने भन्ने स्पष्ट पार्न माग गरेका थिए । यसबीचमा सरकारलाई समर्थन गरिरहेको नेपाल मजदुर किसान पार्टीका प्रेम सुवालले पनि बोल्न पाऊँ भन्दै समय माग गर्नुभएको थियो ।
संविधानमा असन्तुष्ट मधेसी दलको अवरोधका कारण यसअघिका संसद्का बैठक पनि अवरोध हुँदै आएको थियो । संसद्को अर्काे बैठक यही मङ्सिर १५ गते बिहान ११ बजे बस्नेछ ।
