काठमाडौ १० मंसिर ।
चिनीया अध्ययन केन्द्रले भारतीय नाकाबन्दी अमानवीय, मानवअधिकार र अन्तर्राष्ट्रिय कानुन र मर्यादाको ठाडो उल्लंघन भएको जनाएको छ ।
केन्द्रले हिजो विज्ञप्ति जारी गरी दुई देशबिचको सम्बन्धलाई नकारात्मक असर पार्ने भारत सरकरको यस्तो नाकाबन्दी भूपरिवेष्टित देश नेपालको पारवहन अधिकार, संयुक्त राष्ट्र संघ र सार्क बडापत्र, डब्लुटिओको नियम–सम्मत अन्तर्राष्ट्रिय व्यापार, अन्तर्राष्ट्रिय कानुन विपवरित तथा दुई देशबिच अहिलेसम्मको प्रचलन प्रतिकूल रहेको भन्दै यस्तो क्रियाकलापको भत्सर्ना गरेको छ ।
केन्द्रका महासचिव डा. उपेन्द्र गौतमद्वारा जारी विज्ञप्तिमा नेपाललाई आत्मनिर्भर र स्वावलम्बी बनाउन आवश्यक पर्ने सम्झौता र पूर्वाधार तयार पार्ने गरी आवश्यक व्यवस्थापन गर्न नेपाल सरकार तत्पर रहोस् भन्ने अपेक्षा गरिएको उल्लेख छ ।
यस्तो कठिन परिस्थितिमा नेपाली नागरिकले देखाएको धैर्य तथा असहज एवम् सङ्कटमय परिस्थितिको सामना गर्दै राष्ट्रको स्वाभिमान र देशभक्तिको भावनालाई उच्च राख्ने नेपाल सरकारको दृढताको सराहना गरेको छ ।
केन्द्रले यस सङ्कटको परिस्थितिमा आवश्यक आपूर्तिको व्यवस्था गरी एक असल छिमेकीको हैसियतले मैत्री भाव देखाएकामा चीन तथा नेपाललाई सहानुभूति देखाउँदै सहयोग गर्न अग्रसर अन्य अन्तर्राष्ट्रिय समुदायप्रति आभार व्यक्त गरेको छ ।
