काठमाडौ ९ मंसिर ।
सरकारले तराई मधेसमा भइरहेको आन्दोलनलाई लक्षित गरी विशेष सुरक्षा योजना लागू गरेको छ । राजर्मागहरुमा कुनै अवरोध गर्न नदिने गरी योजना ल्याएको गृह मन्त्रालयले जनाएको छ ।
आन्दोलन चर्किएको तराई मधेसको पर्सादेखि सप्तरी तथा नवलपरासीदेखि बाँकेसम्मका जिल्लाहरुमा यो योजना लागु हुनेछ । राजमार्गहरु सुचारु गर्न र सार्वजनिक सम्पत्तिको सुरक्षा गर्न नयाँ एकीकृत सुरक्षा योजना लागू गरिएको गृह प्रवक्ता लक्ष्मीप्रसाद ढकालले बताउनुभयो ।
सुरक्षा योजना अनुसार नेपाल प्रहरी, सशस्त्र प्रहरी र राष्ट्रिय अनुसन्धानको टोली खटाइनेछ । जसमा नेपाल प्रहरी अगाडि रहनेछ भने त्यसलाई सशस्त्र प्रहरीले सहयोग गर्नेछ । सुरक्षा संवेदनशीलताका आधारमा जिल्लाहरुलाई तीन समूहमा वर्गीकरण गरिएको छ भने त्यस अनुसार नै जनशक्ति परिचालन हुने जनाइएको छ ।
गृह प्रवक्ता ढकालका अनुसार विशेष सुरक्षा योजना लागू भएका जिल्लाहरुमा प्रमुख जिल्ला अधिकारीको संयोजकत्वमा रहने जिल्ला सुरक्षा समितिले आवश्यक निर्णय गरेर सुरक्षाकर्मी परिचनलन गर्नेछ ।
