काठमाडौ ८ मंसिर ।
राष्ट्रिय महिला आयोगले यस वर्ष १६ दिने लैङ्गिक हिंसाविरुद्धको अभियान अन्तर्गत विद्यालय स्तरीय कार्यक्रमलाई विशेष जोड दिने भएको छ ।
लैङ्गिक हिंसाबारे विद्यार्थीलाई जानकारी गराउनुपर्ने आवश्यकता महसुस गर्दै भोलीबाट सुरु हुने उक्त अभियान विद्यालय स्तरीय कार्यक्रममा केन्द्रित रहने आयोगले जनाएको छ ।
राजधानीमा आज आयोजना गरेको पत्रकार सम्मेलनमा आयोगका कार्यवाहक अध्यक्ष मनु हुमागाईँले अभियानमा विशेष गरी विद्यार्थीलाई सहभागी गराउने उद्देश्य रहेको जानकारी दिनुभयो ।
यसका लागि आयोगले झापा, चितवन, रुपन्देही, नेपालगन्ज र कञ्चनपुरका विभिन्न विद्यालयमा अन्तक्र्रिया गर्ने भएको छ ।
यस वर्ष सो अभियानमा लैङ्गिक हिंसाविरुद्ध कार्यरत विभिन्न ४० सङ्घसंस्थाको संयुक्त सहभागिता रहनेछ । कार्यक्रम भोली बिहान साँढे ७ बजे भृकुटीमण्डपबाट सुरु हुनेछ ।
अभियानको यस वर्षको नारा ‘घर शान्ति नै विश्व शान्तिको आधार, पुनः निर्माण, शिक्षा र समान व्यवहार’ भन्ने तय गरिएको छ ।
