काठमाण्डौ,७ मंसिर ।
तराईको समस्या समाधानका लागि नेपाली कांग्रेसका महामन्त्री प्रकाशमान सिंह र कांग्रेस पार्टी प्रवक्ता दिलेन्द्रप्रसाद बडूले आज तराई मधेस लोकतान्त्रिक पार्टीका अध्यक्ष एवं मधेसी मोर्चाका नेता महन्थ ठाकुरसँग भेटवार्ता गर्नुभएको छ ।
भक्तपुरको सानोठिमीस्थित ठाकुर निवासमा भएको दुई पक्षीय भेटमा कांग्रेस महामन्त्री सिंहले मधेसको परिस्थिति बिग्रँदै गएको, जनजीवन कष्टकर भएको र नाकाबन्दीले निकै जटिलता ल्याएकाले समस्याको छिटो निकास निकाल्न ठाकुरलाई आग्रह गर्नुभएको थियो ।
महामन्त्री सिंहलाई उद्धृत गर्दै सिंहका स्वकीय सचिव युपी लामिछानेले ठाकुरले अहिलेको जटिल परिस्थितिमा सरकार गम्भीर बन्न नसकेको बताएको जानकारी दिनुभयो ।
भेटमा ठाकुरले परिस्थिति गम्भीर बन्दै गएको भन्दै अब परिस्थिति बिग्रन दिनु नहुनेमा जोड दिनुभयो । अघिल्लो सरकारले गरेको निर्णय घाइतेको उपचार, मृतकलाई क्षतिपूर्ति दिने, झूटा मुद्दा फिर्ता लिने काम पनि सरकारले नगरेको गुनासो गर्नुभयो ।
ठाकुरले मोर्चाको बटमलाइन सीमांकन नै रहेको भन्दै समग्र मधेसको समस्या प्याकेजमै समाधान खोजेर अगाडि बढौं भन्दा सत्तापक्षले बेवास्ता गरेकोे आरोप लगाउनु भयो ।
