काठमाडौ ७ मंसिर ।
मधेसी मोर्चाका कार्यकर्ताको अवरोधका कारण सप्तरीको राजमार्ग क्षेत्रमा रोकिएका सवारी साधनलाई प्रहरीले स्कर्टिङ गरी गन्तव्य तर्फ पठाएको छ । पूर्वबाट आउँदै गरेका र पूर्व जाँदै गरेका झण्डै १३ सय गाडीलाई स्कर्टिङ गरेर प्रहरीले गएराति गन्तव्यतर्फ पठाएको हो ।
पूर्वका लागि छुटेका झण्डै ८ सय सवारी साधनलाई धनुषाको लालगढबाट प्रहरीले स्कर्टिङ गरेर गन्तव्यतर्फ पठाएको यातायात व्यावसायीले बताएका छन् । ती सवारी साधन शनिबार रातिदेखि लालगढ क्षेत्रमा रोकिएको थिए ।
यस्तै पूर्वका विभिन्न ठाउँबाट छुटेका झण्डै पाँच सय सवारीलाई सुनसरीको इटहरीबाट प्रहरीले स्कर्टिङ गरेर गन्तव्य पठाएको छ ।
शनिबार राति सप्तरीको रुपनी, भारदहसहितका राजमार्ग क्षेत्रमा मधेसी मोर्चाका कार्यकर्ता र प्रहरीबिच झडप भएपछि पूर्वका लागि छुटेका गाडी धनुषाको लालगढ तथा पूर्वबाट छुटेका गाडी सुनसरीको इटहरी क्षेत्रमा रोकिएका थिए ।
