सप्तरी, ६ मंसिर ।
पूर्व पश्चिम राजमार्ग अन्तरगत सप्तरीमा प्रहरी र मधेसी मोर्चाका कार्यकर्ताबीच भएको झडपमा २ जनाको मृत्यु भएको छ । आन्दोलनकारीले भने ४ जनाको मृत्यु भएको दाबी गरेका छन ।
२ जनको शब प्रहरीले लगेको उनिहरुको आरोप छ । मध्यरातमा भएको झडपमा भारदाहमा ३ र रुपनीमा एक जना गरि चार जनाको मृत्यु भएको उनिहरुले बताएका छन ।
भारदाहमा डाडा गावीसका २० बर्षीय विरेन्द्र राम र कुपहीका २० बर्षीय श्याम मण्डलको मृत्यु भए पनि उनिहरुको शब भटिएको छैन ।
राजमार्ग अबरोध गर्न बसेका मोर्चाका कार्यकतालाई हटाउने क्रममा स्थिती तनाबपूर्ण बनेपछि प्रहरीले चलाएको गोली लागेर उनीहरुको मृत्यु भएको हो । झडपमा डेढ दर्जनभन्दा बढि घाईते भएका छन् ।
उनीहरुको धरानमा उपचार भइरहेको छ । अबरोध हटाउन सप्तरीका विभिन्न क्षेत्रमा ५ सय राउण्ड भन्दा बढि हवाई फायर गर्नु परेको प्रहरीले जनाएको छ । सो क्षेत्रमा रातभरी प्रदर्शन भएपछि राजधानी आउन लागेका सयौ यात्रुबाहक बस सुनसरीको इटहरीमै रोकिएका छन् ।
प्रदर्शनका कारण कुनै पनि सवारी साधनलाई स्कर्टिङ्ग गर्न नसकिएको प्रशासनले जनाएको छ ।
प्रहरीले केहि महिना यता सो क्षेत्रमा राति स्कर्टिङ्ग मार्फत सवारी साधनलाई गन्तब्यमा र्पुयाउदै आएको थियो । पूर्व सप्तरीदेखि महोत्तरीसम्म राजमार्गमा रातभर प्रदर्शन भएको जनाएको छ ।
झडपपछि स्थानीय प्रशासनले सदरमुकाम राजविराजको अञ्चल प्रहरी कार्यालयबाट नगर प्रहरी कार्यालयसम्म तथा रुपनी र भारदहमा कर्फ्यु लगाएको छ ।
