काठमाण्डौ,४ मंसिर ।
मुस्ताङको पुरानो र ऐतिहासिक महत्व राख्ने थाक पुस्तकालयको भवन पुनर्निर्माण गरिदिन स्थानीयले माग गरेका छन ।
विसं २००७ सालमा टुकुचेबासीको पहलमा ढुङ्गा र विशेष किसिमको माटोबाट निर्मित पुस्तकालयको भवन चर्किएर भत्किने अवस्थामा पुगेको छ । भवनको छानोबाट पानी चुहिने भएपछि दुई महिनादेखि पुस्तकालयमा रहेका पुस्तक नजिकै रहेको रेडक्रसको भवनमा राखिएका छन ।
नेपालमा प्रजातन्त्र प्राप्तिसँग जोडिएको पुस्तकालयको भवन पुनर्निर्माण गर्न स्थानीयले माग गरेका छन् । थाक पुस्तकालय व्यवस्थापन समितिका कोषाध्यक्ष पथबहादुर थकालीले प्रजातन्त्र स्थापना भएको सालमै स्थापना भएको पुस्तकालयको ऐतिहासिक महत्व रहेको बताउनुभयो ।
पुस्तकालयको नयाँ पक्की भवन निर्माण गर्न स्थानीयले जिल्ला विकास समितिलाई समेत आग्रह गरेका छन् । पुस्तकालयमा विद्यालयका पुस्तकदेखि धर्म, साहित्य, कला र ऐतिहासिक महत्वका सात हजार पुस्तक छन् ।
नयाँ भवनलाई रु ६० लाख बजेट आवश्यक पर्ने पुस्तकालय व्यवस्थापन समितिले जनाएको छ । पुस्तकालयमा पुस्तक र आन्तरिक व्यवस्थापनमा रिड नामक शैक्षिक संस्थाले निरन्तर सहयोग गर्दै आएको छ ।
