काठमाडौ ३ मंसिर ।
तराई मधेशमा आन्दोलनरत मधेशी मोर्चाको बैठक आज बस्दैछ । सरकारसँग हिजो भएको वार्ता निष्कर्षबिहिन भएपछि थप रणनिति बनाउन मोर्चाले बैठक बोलाइएको हो ।
सिंहदरबार स्थित संसदीय दलको कार्यलयमा बिहान ११ बजेपछि सुरु हुने बैठकमा मोर्चाको आगामी रणनितिबारे छलफल हुने मोर्चा आवद्ध दल सद्भावना पार्टीका महासचिव मनिषकुमार सुमनले जानकारी दिनुभयो ।
संसदीय समिति वा राजनितिक उच्च समिति बनाएर सिमांकनको विवाद मिलाउने सत्तारुढ एमाले र एकिकृत नेकपा माओवादीको प्रस्तावलाई मोर्चाले अस्विकार गरेपछि निर्णयक हुने भनिएको हिजोको वार्ता बिना निष्कर्ष टुङ्गिएको थियो ।
वार्तामा प्रमुख प्रतिपक्षी दल नेपाली कांग्रेस भने सहभागी थिएन । मोर्चाले गत कार्तिक १५ गते बुझाएको ११ बुँदे मागबारे संयुक्त धारणा बनाएर मात्रै वार्तामा बस्नका लागि तीन दललाई आग्रह गरिएको सुमनले बताउनुभयो ।
आजको बैठकमा बजार , राजमार्ग र नाकामा शान्तिपूर्ण तवरले आन्दोलन गर्ने विषयमा छलफल हुने मोर्चाले जनाएको छ ।
