काठमाडौं, २९ कार्तिक ।
चीनले काभ्रेको पाँचखालमा संयुक्त भन्सार स्थापना गरेर ग्यासका बुलेट सिधै पाँचखालसम्म ल्याउन प्रस्ताव राखेको छ ।
उपराष्ट्रपति नन्दबहादुर पुनसँग आज भएको भेटमा चीनका लागि नेपाली राजदूत डा. महेश मास्केले यसबारे जानकारी गराउनुभएको हो ।
नेपालका लागि चिनियाँ राजदुत वु चुन्ताईसँग आज विहान छलफल भएको र चिनियाँ राजदुतले काभ्रेको पाँचखालमा संयुक्त भन्सार स्थापना गरेर ग्यासको बुलेट सिधै पाँचखालसम्म ल्याउन चीन तयार रहेको जानकारी गराएको मास्केले बताउनु्भयो ।
उपराष्ट्रपति कार्यालय बहादुर भवनमा भएको भेटमा डा. मास्केले चीनबाट इन्धन ल्याउन दुई देशबीच सैद्धान्तिक सम्झौता भइसकेकाले व्यापारिक सम्झौताको अन्तिम तयारी भइरहेको जानकारी गराउनुभएको थियो ।
उहाँले चीनले अहिलेसम्म इन्धन निर्यात नगरेकाले निर्यातसम्बन्धी नियम बनाउन लागिरहेकाले व्यापारिक संझौता हुन केही ढिला भइरहेको बताउनुभएको थियो । राजदुत चुन्ताई भोली स्वदेश फर्किदै हुनुहुन्छ ।
