काठमाण्डौ, २५ कार्तिक ।
चीनले अनुदानमा दिएको २ लाख ७० हजार लिटर पेट्रोल रसुवागढी नाकाबाट आज नेपाल भित्रिएको छ ।
चीनले अनुदानमा दिएको १३ लाख लिटरमध्ये आज मात्रै २ लाख ७० हजार लिटर पेट्रोल नेपाल आएको रसुवागढी भन्सार कार्यालयले जनाएको छ । तेल बोकेका २६ वटा ट्यांकर बिहीबार राति नै काठमाडौं आइपुग्ने नेपाल आयल निगमका थानकोट डिपो प्रमुख रविन शर्माले जानकारी दिनुभयो ।
अब चीनबाट ३ लाख ७५ हजार लिटर अनुदानको पेट्रोल नेपाल भित्रिन बाँकी छ । बाँकी तेल लिन तिहारपछि एकैपटक ट्यांकर पठाउने आयल निगमको योजना छ ।
चीनसँग ब्यापारिक रुपमा तेल ल्याउन सम्झौता हुनुअघि नै कारोबार सुरु गर्न आयल निगमले चाइना नेशनल पेट्रोलियम कर्पोरेशन (पेट्रो(चाइना) लाई आग्रह गरेको छ ।
अनुदानको पेट्रोलको धारैटी राजश्व स्वरुप आयल निगमले ३ करोड ६४ लाख रुपैयाँ रसुवागढी भन्सारलाई एकैपटक बुझाएको छ । आयल निगमले चीनबाट आएको पेट्रोलको वितरण सुरु गरिसकेको छ ।
