ताप्लेजुङ, १९ कात्तिक ।
मङ्लबार साँझ प्रहरीसँगको दोहोरो भिडन्तमा ज्यान गुमाएका हाराहाङ नेतृत्वको आपराधिक समूहमा आबद्ध खेजेनिम–३ का २५ वर्षीय समिर लिम्बूको शव आज उनको परिवारलाई जिम्मा लगाइएको छ ।
लिम्बूकी दिदी चन्द्रकला लिम्बूलाई शव परीक्षण गरी जिम्मा लगाइएको जिल्ला प्रहरी कार्यालय ताप्लेजुङका प्रहरी निरीक्षक रामेश्वर पण्डितले जानकारी दिनुभयो । मङ्गलबार साँझ जिल्लाको सान्थाक्रा गाविसमा देउमान लिम्बू हाराहाङ नेतृत्वको आपराधिक समूहसँग प्रहरीको भिडन्तमा लिम्बूको ज्यान गएको थियो । सो आपराधिक समूहको खोजी गर्दै पुगेको प्रहरीमाथि लुकेर बसेका सो समूहका सदस्यले गोली चलाएपछि दोहोरो भिडन्त भएको थियो ।
भिडन्तका क्रममा मृतक लिम्बूका साथ र घटनास्थलबाट विभिन्न विस्फोटक पदार्थसहितका सामान बरामद गरिएको थियो । सो आपराधिक समूहले लेकाली गोठमा लुकेर बस्ने र गाउँगाउँमा आएर चन्दा असुल्ने, लुटपाट गर्ने, धाकधम्की देखाउँदै हिँड्ने गरेको प्रहरीले जनाएको छ । इखावु घर भएका देउमान लिम्बू हाराहाङ भनिनेको विरुद्धमा ज्यान मार्ने उद्योग, डकैतीसमेत गरी यस जिल्लामा तीनवटा मुद्दा छन् भने अन्य जिल्लामा पनि दर्जनौँ मुद्दा रहेको बताइएको छ ।
