काठमाडौं, १७ कार्तिक ।
पूर्व नेता डा. बाबुराम भट्टराई समर्थक ४५ जना केन्द्रीय नेताहरुले सामूहिक राजीनामा दिएका छन् ।
अहिलेको राजनीतिक संकट परम्परागत शक्तिबाट हल नहुँने तथा देशलाई आर्थिक समृद्धिको दिशामा लैजान नयाँ वैकल्पिक शक्तिको आबश्यकता रहेको भन्दै उनीहरुले एकीकृत माओवादी हेडक्वाटर पेरिसडाँडामा पुगेर सामूहिक राजीनामा पत्र बुझाएका हुन् ।
राजीनामा पत्र बुझाउनुपूर्व उक्त टोलीले हिजो विहान देखि तीनकुनेस्थित झिल्को रेष्टुरेन्टमा बसेर छलफल गरि राजीनामा पत्र तयार पारेका थिए ।
उक्त राजीनामा पत्र पार्टी केन्द्रीय कार्यलयका मुख्य सचिव हितराज पाण्डेलाई बुझाइएको हो । पौडेलले मुख्य सचिवलाई पत्र दिएपछि पार्टी अध्यक्षलाई जानकारी गराउन आग्रह गरेका थिए ।
यस अघि गत २३ गते बाबुराम नजिक मानिएका एकीकृत माओवादीका तीस केन्द्रीय सदस्यले विज्ञप्ती निकालेर केपी ओलीलाई प्रधानमन्त्री बनाउने पार्टी निर्णयको विरोधमा विज्ञप्ती जारी गरेका थिए ।
एमाओवादी परित्याग गर्नेमा देवेन्द्र पौडेल, हिसिला यमी, रामचन्द्र झा, नवराज सुवेदी, रामरिझन यादव, गंगा श्रेष्ठ, खिमलाल देवकोटा, रामकुमार शर्मा लगायत छन् ।
बाबुरामले एमाओवादी त्याग गरेपछि उनी निकट मानिएका एमाओवादीका नेताहरु पार्टी काममा भन्दा पनि भट्टराईकै काममा व्यस्त देखिएका थिए । एकीकृत माओवादीमै रहेर नयाँ शक्तिको लविङ गर्दा नैतिक प्रश्न उठेको भन्दै उनीहरुले सामुहिक राजीनामा बुझाएका हुन ।
बाबुराम नजिक मानिएका केही केन्द्ीय नेताहरुले भने राजीनामा दिएका छैनन् । पार्टी सचिव एवम् संसदीय दलका उप नेता टोपबहादुर रायमाझीसहितका नेताहरु सामूहिक राजीनामा दिन तयार भएनन् ।
रायमाझीबाहेक भट्टराई नजिक मानिएका सुदुरपश्चिमका केन्द्रीय सदस्यद्धय खगराज भट्ट र देवराज रेग्मीले पनि राजीनामा दिएका छैनन् । उनीहरुले भट्टराईको नयाँ शक्तिमा जान नसकिने बताएका छन् ।
सभासद्हरुले पनि राजीनामा गरेका छैनन् । डा.बाबुराम भट्टराईले एमाओवादी पदत्यागको ३८ दिनपछि उनका समर्थक नेताहरुले पार्टी परित्याग गरेका हुन ।
