काठमाडौं, १६ कार्तिक ।
प्रहरीको गोली लागेर वीरगन्जमा एक भारतीय नागरिकको मृत्यु भएको भएको छ । मृतकका बाउ आमाले अस्पतालमै पुगेर शब पहिचान गरेका हुन ।
नेपाल–भारत सीमाना मितेरी पुलमा मधेशी मोर्चाका कार्यकर्ताले प्रहरीमाथि ढुङ्गामुढा गरेपश्चात स्थिति नियन्त्रणमा लिने क्रममा भएको झपडमा परी वीरगंज उपमहानगरपालिका–११ बस्ने भारतीय नागरिक २५ वर्षीय आषिशकुमार रामको मृत्यु भएको हो ।
झडपमा गोली लागेर घाइते भएका रामको नारायणी उप–क्षेत्रीय अस्पताल वीरगंजमा उपचारको क्रममा मृत्यु भएको जिल्ला प्रहरी कार्यालयले जनाएको छ ।
प्रदर्शनकारीले सीमास्थित माइती नेपालको कार्यालय र इनर्वा प्रहरी चौकीमा आगजनी गरेपछि लाठीचार्ज र अश्रुग्याँस प्रहार गरी स्थितिलाई नियन्त्रणमा लिन प्रयास गर्दा प्रदर्शनकारीहरु थप आक्रामक भएपछि प्रहरीले बल प्रयोग गर्दा भएको झडपमा रामलाई गोली लागेको थियो ।
त्यस्तै प्रदर्शनकारीको ढुङ्गा लागेर ६ जना प्रहरी कर्मचारी घाइते भएका छन् । उनीहरुको स्थानिय मेडिकलमा उपचार भइरहेको छ भने प्रदर्शनकारीतर्फ घाइते भएका ८ जनाको नारायणी उप–क्षेत्रीय अस्पतालमा उपचार भइरहेको छ ।
नेपाल प्रहरी र सशस्त्र प्रहरी बलको टोली खटेपछि अहिले स्थिति सामान्य रहेको छ ।
