काठमाण्डौ,१६ कात्तिक ।
खसीबोका व्यवसायी संघ पोखरा र कास्की खसी तथा कुखुरा मासु व्यवसायी समितिले अबदेखि भारतबाट खसीबोका नल्याउने भएका छन ।
ती संंस्थाले पत्रकार सम्मेलन गरी भारतले इन्धन र ग्यासलगायतका अत्यावश्यक वस्तु नेपालमा पठाउन आनाकानी गर्ने र अनावश्यक, कम महत्व र छिटो बिग्रने फलपूmल, तरकारी भने पठाउने गरेको विरोधमा सो निर्णय गरिएको बताइएको छ ।
मधेसवादी दलहरुले गरेको आन्दोलनलाई समर्थन गर्दै भारतले अघोषित नाकाबन्दी गरेर नेपालीको जनजीवनलाई कष्टकर बनाएको भन्दै खसीबोका व्यवसायी समितिले जिल्लालाई चाहिने खसीबोका अबदेखि सुर्खेत, दाङ, नेपालगन्जलगायतका ठाउँबाट ल्याउने भएका छन ।
जिल्लामा मासिक छ हजार ५०० वटा खसीबोका खपत हुने गरेकामा त्यसको ६० प्रतिशत भारतबाट ल्याउने गरिएको थियो । जिल्लामा हाल दैनिक ५० हजार किलो कुखुरा र १० हजार किलो खसीबोकाको मासु बिक्री हुने गरेको बताइएको छ ।
