कात्तिक १४, काठमाडौं ।
मुलुकको दोस्रो उपराष्ट्रपतिका लागि अहिले व्यवस्थापिका संसदमा मतदान जारी छ । उपराष्ट्रपति चयनका लागि बिहान ११ बजेदेखि सुरु भएको मतदान दिउसो २ बजेसम्म चल्नेछ ।
नयाँ उपराष्ट्रपति पदका लागि एकीकृत नेकपा माओवादीका नेता नन्दकिशोर पुन र नेपाली काग्रेसका नेता अमियकुमार यादव प्रतिस्पर्धामा हुनुहुन्छ ।
सत्तारुढ गठबन्धनका तर्फबाट उमेद्वारी दिनुभएका एकीकृत माओवादी नेता पुनको प्रस्तावकमा एमालेका बरिष्ठ नेता झलनाथ खनाल र समर्थकमा राप्रपा नेपालका दीलनाथ गिरी रहनुभएको छ ।
अहिलेको समीकरण अनुसार सत्तारुढ दलहरुसंग स्पष्ट बहुमत भएका कारण एमाओवादी नेता पुन निर्वाचित हुने लगभग निश्चित जस्तै देखिएको छ ।
यादवको प्रस्तावकमा भने कंग्रेसका प्रमुख सचेतक चीनकाजी श्रेष्ठ र समर्थकमा कंग्रेसका सचेतक इश्वरी न्यौपाने रहनुभएको छ ।
व्यवस्थापिका संसदमा हाल कायम रहेका ५ सय ९७ मध्ये २ सय ९९ मत प्राप्त गर्ने उम्मेदवार नेपालको भावी उपराष्ट्रपति बन्नेछ । साझ ५ बजेपछि बस्ने संसद बैठकमा परिणाम घोषणा हुने संसद सचिवालयले जनाएको छ ।
