काठमाडौं, १३ कार्तिक ।
नेकपा एमालेका उपाध्यक्ष वामदेव गौतमले आफू एमालेको कार्यवाहक अध्यक्ष बन्ने चाहाना नभएको बताउनु भएको छ । प्रधानमन्त्री ओलीलाई सफल बनाउन आफू निस्वार्थरुपमा लाग्ने गौतमले प्रतिवद्धता व्यक्त गर्नुभयो ।
आफुले पार्टीको कार्यवाहक अध्यक्षको माग, आशय र अनुरोध कोहीसँग नगरेको र नगर्ने पनि वरिष्ठ उपाध्यक्ष गौतमको भनाइ छ ।
आफूले केपी ओलीलाई संसदीय दलको नेता र पार्टी अध्यक्ष बनाउँदा होस् या प्रधानमन्त्री बनाउँदा ,कुनै स्वार्थ र शर्तविना नै सहयोग गरेको गौतमले बताउनुभयो छ ।
यसैवीच विगतमा एक व्यक्ति एक पदको वकालत गर्दै आउनुभएका प्रधानमन्त्री केपी ओलीले पार्टीको कार्यबाहक अध्यक्षको जिम्मेवारी कसैलाई नदिने एमाले स्रोतले जनाएको छ ।
एमालेका बरिष्ठ नेता माधवकुमार नेपालले कार्यवाहक अध्यक्ष बन्ने चाहना राखेको बताइए पनि ओलीले प्रधानमन्त्री, संसदीय दलको नेता र पार्टीको अध्यक्ष तीनवटै पद आफैंले राख्न चाहेको एमाले सूत्रहरुको भनाइ छ ।
