काठमाडौ १३ कार्तिक ।
भूकम्प र त्यसपछि तराई मधेशमा जारी आन्दोलनले नेपालका लाखौं बालबालिकाको भविष्य जोखिममा परेको भन्दै संयुक्त राष्ट्रसंघले गम्भीर चिन्ता व्यक्त गरेको छ ।
राष्ट्रसंघको बालबालिका हेर्ने निकाय युनिसेफले ‘बालबालिका शान्ति क्षेत्र स्थापना’ मा जोड दिँदै अहिले उनीहरू पठनपाठनबाट वञ्चित भएकोप्रति चिन्ता व्यक्त गरेको हो ।
विशेष गरी तराई र भूकम्पबाट अति प्रभावित मध्य तथा मध्यपूर्वी पहाडी जिल्लाका बालबालिका प्रभावित भएको युनिसेफले जनाएको छ ।
वर्तमान अवस्थाको सिधा असर बालबालिकाको शिक्षाको पहुँचमा परेको युनिसेफका नेपाल प्रतिनिधि टोमो होजिनीद्वारा जारी विज्ञप्तिमा उल्लेख गरिएको छ ।
भूकम्पपछि अहिलेसम्मका ६ महिनामा विद्यालयहरू झन्डै आधा अवधि मात्र खुलेको अवस्थामा अहिलेको अवस्थाले पूर्वी तराई र अन्य क्षेत्रका बालबालिकामा बढी प्रभाव परेको विज्ञप्तीमा जनाएको छ ।
बालबालिकालाई शान्तिक्षेत्रका रूपमा गम्भीरतापूर्वक लिनुपर्ने आग्रहलाई दोहोर्याउदै राजनीतिक तनाव, अशान्त र द्वन्द्वको अवस्थाबाट बालबालिका मुक्त हुन आवश्यक रहेको युनिसेफले जोड दिएको छ ।
