काठमाडौं,१२ कात्तिक ।
सरकार र आन्दोलनरत संयुक्त लोकतान्त्रिक मधेसी मोर्चाबीच आज भएको वार्ता निष्कर्ष्विहीन भएको छ ।
सिंहदरबारस्थित परराष्ट्र मन्त्रालयमा भएको वार्तामा सरकारी वार्ता टोलीले सीमांकनका विषयमा स्पष्ट खाका पेश गर्न नसकेपछि निष्कर्षबिहिन भएको हो । मोर्चाले अहिले प्रदेश नम्बर १ मा रहेको झापा, मोरङ र सुनसरी तथा प्रदेश ७ मा रहेको कैलाली र कन्चनपुरलाई तराईमा बन्ने २ वा प्रदेशमा समेट्नुपर्ने अडान कायमै राखेको छ ।
बैठकपछि सन्चारकर्मीहरुसँग कुरा गर्दै उपप्रधान तथा परराष्ट्रमन्त्री कमल थापाले अधिकांश विषयमा मोर्चासँग सहमति भइसकेकाले आन्दोलन रोकेर सहमतिमा अघि बढ्न आग्रह गरेको जानकारी दिनुभयो ।
मोर्चाका वार्ता टोलीका सदस्य तथा सद्भावना पार्टीका उपाध्यक्ष लक्ष्मणलाल कर्णले भने सरकारी वार्ता टोली आजपनि ठोस रुपमा प्रस्तुत नभएको बताउनुभयो ।
