काठमाडौं, ११ कार्तिक ।
विराटनगरमा मधेसी मोर्चाका कार्यकर्ता र व्यवसायिबीच झडप भएको छ ।
आज बिहानै बन्द गराउँदै हिँडेका बन्दकर्ताको प्रतिकार गर्न खोजेपछि झडप भएको प्रहरीले जनाएको छ ।
लामो समयको बन्दपछि खुलेका पसल तथा व्यवसाय बन्द गराउन थालेपछि व्यवसायी आक्रोशित भएका हुन ।
विराटनगरको महाबिर चोकमा बन्दकर्ताको बिरोधमा व्यवसायी निस्किएपछि बन्दकर्ता आक्रोशित भएका थिए ।
शान्तिपूर्ण बन्द गराउँदै हिँडेका आन्दोलनकारीलाई प्रहरीको आडमा व्यवसायीले ढुङ्गा हानेपछि झडप भएको संघीय समाजवादी फोरमका जिल्ला अध्यक्ष राजकुमार यादवले बताउनुभयो ।
प्रहरीले विराटनगरमा व्यापार व्यवसाय बन्द गराउँदै हिँडेका तीन जना नेतालाई पक्राउ गरेको छ ।
शनीमन्दीर चौकमा सडक अबरुद्ध गर्दै आएका तथा सोही क्षेत्रमा बन्द गराउँदै हिँडेका संघीय समाजवादी फोरम नेपालका जिल्ला अध्यक्ष राजकुमार यादव, तमलोपाका केन्द्रीय सदस्य तथा मोरङ जिल्ला अध्यक्ष मोहअम्मद कादिर र संघीय समाजवादी फोरमका जिल्ला सदस्य कन्हैयालाल साहलाई पक्राउ गरिएको मोरङका प्रहरी प्रवक्ता प्रहरी नायव उपरिक्षक प्रमोद खरेलले जानकारी दिनुभयो ।
प्रहरी नायव उपरिक्षक खरेलले सडकमा बसेर धर्ना दिएकोले सडक अबरुद्ध गर्न नदिने आदेश अनुसार उनीहरुलाई पक्राउ गरिएको जानकारी दिनुभयो ।
यसैबीच आन्दोलनरत मधेशी मोर्चाका कार्यकर्ताले रौतहटको गरुडामा दुई ओटा मोटरसाइकलमा आगजनी गरेका छन् ।
गएराति गरुडा नगरपालिका १३ स्थित जयनगर चोकमा गौरबाट आउदै गरेका दुई ओटा मोटरसाइकलमा मोर्चाका कार्यकर्ताले आगजनी गरेका हुन् ।
ना १ प ५१०५ नम्बरको मोटरसाइकलमा आगजनीका क्रममा चालक रामप्रवेश शाह र पछाडि सवार सुरेश शाह कलवार सामन्य घाइते भएका छन् ।
