काठमाण्डौ,६ कात्तिक ।
मधेसी जनअधिकार फोरम लोकतान्त्रिकका जिल्ला अध्यक्षसहित कार्यसमितिका अधिकाशं सदस्यले पार्टी परित्याग गरेका छन ।
तराई मधेसको समस्यालाई यथावत राखेर पदको लोभमा पार्टीका केन्द्रीय अध्यक्ष विजयकुमार गच्छदार सरकारमा सहभागी भएपछि रुष्ट बनेका कार्यसमिति सदस्यले साधारण सदस्यसमेत नरहनेगरी राजीनामा दिएका छन ।
रौतहट जिल्ला अध्यक्ष अजय गुप्तासहित सहसचिव, कोषाध्यक्ष र सदस्यसमेत तथा पार्टीका भातृसंगठनमा आबद्ध रहेका शिक्षक, युवा, दलित र किसान संगठनका अध्यक्ष विभिन्न क्षेत्रका क्षेत्रीय अध्यक्षले समेत सयौं नेता कार्यकर्ताले पार्टी परित्याग गरेको गुप्ताले बताउनु भयो ।
नेपाल भारत सीमा क्षेत्रको गौर(बैरगनिया नाकामा मोर्चाले जारीराखेको धर्नास्थलबाटै राजीनामा दिएका अध्यक्ष गुप्ताले मधेस र मधेसीको अधिकार सुनिश्चित गराउन सुरु भएको आन्दोलन दुई महिना लामो अवधिमा पुग्दा र ४२ जना शहिद हुँदासमेत सरकार पक्षबाट कुनै सुनवाई नभएको अवस्थामा आफ्नै पार्टी पनि सरकारमा सहभागी हुन मधेसी जनताको भावनाविरुद्ध भएको भन्दै आफूहरुले पार्टी परित्याग गरेको बताउनु भयो ।
पार्टीको केन्द्रीय कार्यसमितिले अहिलेसम्म पनि सरकारमा सहभागी भएका अध्यक्ष गच्छदारलाई कारबाही नगरेकोमा दुःख व्यक्त गर्दै राजीनामा दिएका छन ।
