काठमाण्डौ,१९ असोज ।
चितवनको सौराहामा भएको चरा विज्ञको पाँचदिने राष्ट्रिय कार्यशाला गोष्ठीले नेपालमा १७० प्रजातिका चरा सङ्कटापन्न अवस्थामा रहेको निष्कर्ष निकालेको छ ।
यसअघि १४९ प्रजातिका चरा सङ्कटमा रहेको पाइएकामा अहिले थप २१ प्रजातिका चरा सङ्कटापन्न अवस्थामा रहेको निष्कर्ष निकालिएको हो । वर्ड एजुकेसन सोसाइटी चितवनका निवर्तमान अध्यक्ष वासु विँडारीले नेपालका चरामध्ये करिब २१ प्रतिशत चरा खतरामा रहेको पाइएको जानकारी दिनुभयो ।
हिमालयन नेचर, जिओलोजिकल सोसाइटी अफ लण्डन र राष्ट्रिय प्रकृति संरक्षण कोषको आयोजनामा देशभरका करिब ६० जना चरा विज्ञको सहभागितामा असोज १४ गतेदेखि पाँचदिने गोष्ठी सुरु भएको थियो । सन् २०१२ पछि यो पहिलो गोष्ठी भएको चरा विज्ञ डा हेमसागर बरालले जानकारी दिनुभयो ।
एक महिनाभित्रमा सङ्कटापन्न अवस्थामा रहेका चराको विस्तृत विवरणसहितको पुस्तक तयार पार्ने गरी भेला सकिएको चरा विज्ञ राजु आचार्यले जानकारी दिनुभयो ।
गोष्ठीमा सङ्कटापन्न ६६ प्रजातिका चराको विषयमा करिब तीन हजार सन्दर्भ सामग्री सङ्कलन गरेर छलफल भएको थियो । हाल विश्वमा नौ हजार प्रजातिका चरा छन् । नेपालमा ८७५ र चितवनमा ६२९ प्रजातिका चरा रहेको तथ्याङ्क छ ।
