काठमाडौं, असोज १२ । नेपाल आयल निगमले पेट्रोलियम पदार्थ दिने कि नदिने भनेर भारतीय आयल कर्पोरेसन (आइओसी)लाई पत्र पठाएको छ ।
विगत ४० वर्षदेखि पेट्रोलियम पदार्थको कारोबार गर्दै आएको निगमले आइओसीलाई पेट्रोलियम पदार्थ नदिने भए नेपाल सरकारले विकल्प खोज्नेसहितको पत्र आइओसीलाई पठाएको हो ।
आइओसीले १ सय ५० भन्दा बढी नेपाली ट्यांकरमध्ये ५/६ ओटामा मात्रै पेट्रोलियम पदार्थ ‘लोड’ गरेको भन्दै मंगलबार त्यस्तो पत्र पठाइएको निगमका प्रवक्ता दीपक बरालले बताए ।
उनले सरकारको निर्देशन आएलगत्तै अन्यत्रबाट पनि पेट्रोलियम पदार्थ आयात गर्न निगम लाग्ने पनि बताए ।
प्रवक्ता बरालले आइओसीले देखाउनको लागि मात्रै नगन्य मात्रामा नेपाली ट्यांकर लोड गरेको त्यो पनि नाकामा रोखिएको बताए । उनले अब सरकारले विकल्प खोज्ने पनि बताए ।
यसैबीच, मंगलबार निगमले काठमाडौं उपत्यकामा १ लाख ३ हजार लिटर पेट्रोल र २ लाख ३६ हजार लिटर डिजेल बिक्री गरेको जनाएको छ ।
निगमले मंगलबार उपत्यकाका ५६ ओटा पम्पलाई डिजेल र १३ ओटा पम्पलाई पेट्रोल उपलब्ध गराएको जनाएको छ ।
